જય શાહની જગ્યાએ આ બન્યા BCCIના વચગાળાના સચિવ, પ્રમુખે જ કરી નિયુક્તિ

નવી દિલ્હી, 9 ડિસેમ્બર : ભારતીય ક્રિકેટ કંટ્રોલ બોર્ડ (BCCI)ના પ્રમુખ રોજર બિન્નીએ સંયુક્ત સચિવ દેવજીત સૈકિયાને બોર્ડના વચગાળાના સચિવ તરીકે નિયુક્ત કર્યા છે. BCCI પ્રમુખે બંધારણમાં આપવામાં આવેલી તેમની વિશેષ સત્તાઓનો ઉપયોગ કરીને સૈકિયાને સચિવ તરીકે નિયુક્ત કર્યા છે. જય શાહ છેલ્લા ઘણા વર્ષોથી આ હોદ્દો સંભાળી રહ્યા હતા, પરંતુ તેમણે 1 ડિસેમ્બરે ICC અધ્યક્ષ તરીકેનો કાર્યભાર સંભાળ્યો હતો. આ જ કારણ છે કે જય શાહે BCCI સેક્રેટરીનું પદ છોડવું પડ્યું હતું.

બીસીસીઆઈના બંધારણની કલમ 7.2 (ડી) જણાવે છે કે, ઓફિસમાં કોઈ જગ્યા ખાલી હોય અથવા કોઈ પદાધિકારીની માંદગીના કિસ્સામાં અધ્યક્ષ એ ખાલી જગ્યા યોગ્ય રીતે ભરાઈ ન જાય અથવા તે બીમારીથી સાજા ન થાય ત્યાં સુધી અન્ય પદાધિકારીને ફરજો સોંપવી જોઈએ.

જો કે, એ હજુ સુધી એ સ્પષ્ટ નથી કે આ વ્યવસ્થા આવતા વર્ષે સપ્ટેમ્બર સુધી રહેશે કે નહીં, કારણ કે આગામી ત્રણ વર્ષની બીસીસીઆઈની ચૂંટણી એક જ સમયે યોજાવાની છે. શક્ય છે કે નવા સચિવની પસંદગી ન થાય ત્યાં સુધી સંયુક્ત સચિવને સચિવ બનાવવામાં આવે.

ક્રિકબઝના અહેવાલ મુજબ, રસપ્રદ વાત એ છે કે રોજર બિન્ની તરફથી દેવજીત સૈકિયાને સેક્રેટરીની ફરજો સોંપવામાં આવેલો અધિકૃત મેલ કોઈપણ રાજ્ય સંગઠનને મોકલવામાં આવ્યો નથી. હસ્તાક્ષર કરવાની સત્તા ધરાવતા વચગાળાના ધોરણે સચિવ તરીકે કામ કરવા માટે માત્ર સાયકિયાને જ જાણ કરવામાં આવી છે.

વચગાળાના સચિવની નિમણૂકની જરૂરિયાત ઊભી થઈ કારણ કે સચિવ જય શાહે ICCના સ્વતંત્ર અધ્યક્ષ તરીકેનો કાર્યભાર સંભાળ્યો હતો. આઈસીસીના સ્વતંત્ર અધ્યક્ષ તરીકે તેઓ અન્ય કોઈ સભ્ય બોર્ડ સાથે જોડાયેલા રહી શકતા નથી. સૈકિયાના પ્રમોશનના પ્રથમ સંકેત તાજેતરમાં જ જોવા મળ્યા જ્યારે તેણે ICCમાં BCCIનું પ્રતિનિધિત્વ કર્યું હતું. શાહે ચાર્જ સંભાળ્યો ત્યારે તેમણે 5 ડિસેમ્બરે દુબઈમાં ICC બોર્ડની બેઠકમાં હાજરી આપી હતી.

આ પણ વાંચો :- રાજ્યના 25 IPS અધિકારીઓની બદલી, જૂઓ કોણ ક્યાં મુકાયા